በገቢዎች ሚኒስቴር የከፍተኛ ግብር ከፋዮች ቅ/ጽ/ቤት ከግብር ከፋዮችና ከባለ ድርሻ አካላት ጋር የካቲት 20/2013 ዓ.ም  ውይይት አካሂዷል፡፡

በውይይቱ ተገኝተው መልዕክት ያስተላለፉት የገቢዎች ሚኒስትር አቶ ላቀ አያሌው፤ ከፍተኛ ግብር ከፋዮች ሀሰተኛ ደረሰኝ ከመጠቀምና ሀሰተኛ ኪሳራ ከማሳወቅ በመቆጠብ ለታክስ ህግ ተገዢ በመሆን ዘመናዊ የንግድ ስርዓት በማስተዋወቅ የልዕቀት ማዕከል ሊሆኑ እንደሚገባ ተናግረዋል፡፡

በሰባት ወራት ውስጥ ከተሰበሰበው ጠቅላ ገቢ የከፍተኛ ግብር ከፋዮች ድርሻ 50 በመቶ ከሀገር ውስጥ ገቢ ደግሞ 80 በመቶ ድርሻ አለው ነው ያሉት፡፡

ሚኒስትሩ አክለውም ከድህነትና ኋላቀርነት የተላቀቀች ሀገር ለመገንባት በገቢ ሰብሳቢ በኩል የሚስተዋለው የአሰራር ግድፈቶችን ማረም፣ የአገልግሎት አሰጣጥን ማዘመን፣ በደንበኞች የሚቀርቡ ቅሬታዎችን በቅንነት ተቀብሎ በማስተናገድ የገቢ መሰረትን ለማስፋት እንሰራለን ብለዋል፡፡

ግብር ከፋዮች ግብር መሰወርና ማሸሽ ሀገራዊ ወጪ በሀገራዊ ገቢ የመሸፈን ራዕያችንን የሚያደናቅፍ በመሆኑ ግብር ከፋዮች ከዚህ ችግር እንዲወጡ አሳስበዋል፡፡

የታክስ አማካሪነትና ጉዳይ አስፈጻሚነት እንደ ሽፋን በመጠቀም ግብር ከፋዮችን ወደ አልተገባ ድርጊት የሚወስዱ ህገወጦች በመኖራቸው የታክስ ህግ ተገዢነት እንዳይተገበር እያደረገ መሆኑን ገልጸዋል፡፡

የከፍተኛ ግብር ከፋዮች ቅ/ጽ/ቤት ስራ አስኪያጅ አቶ ታሬሳ እንሴሱ በበኩላቸው ቅ/ጽ/ቤቱ በሰባት ወራት ውስጥ 79.98 ቢሊየን ብር በመሰብሰብሰብ የእቅዱን 108 በመቶ ማሳካቱን እንዲሁም በፌደራል ደረጃ ተሸላሚ ለነበሩ 150 ግብር ከፋዮች ልዩ አገልግሎት እየሰጠ መሆኑን ተናግረዋል፡፡

በገቢዎች ሚኒስቴር የታክስማጭበርበርና ምርመራ ዳይሬክተር አቶ ሲሳይ ገዙ በውይይቱ ወቅት እንደገለጹት ከዕቅድ አንጻር የሚሰበሰበው ገቢ ከጊዜ ወደ ጊዜ እድገት ቢያሳይም ወጪን ከመሸፈን አንጻር የሚቀሩ ስራዎች እንዳሉ ገልጸዋል፡፡ በ2012 በጀት ዓመት በታክስ ገቢ የሀገሪቱን 48 በመቶ ብቻ ወጪ እንደሸፈነና ኢኮኖሚው ከሚያመነጨው ገቢ 8.66 በመቶ ብቻ እየተሰበሰበ ሲሆን ለዚህም ዋነኛው ምክንያት የታክስ ህግ ተገዢነት ችግር መሆኑን ጠቁመዋል፡፡